• Castellano
• Euskera

• Datu orokorrak
• Antolatzailea
• Lotura interesgarriak

Zumalakarregi Museoak aldi baterako erakusketa berria aurkezten du. Datorren ostegunean, uztailak 20, zabalduko dugu Eustaquio Berriotxoa urretxuarrak Rifen egin zituen argazkiak osatzen duen erakusketa Ormaiztegin. Rifeko gerraren garaian eginak izan arren bertako gizartearen gertuko ikuspegia eskaintzen dute.

XX. mende hasieran europearrak Afrikan egindako banaketan Espainiari zegokion protektoratuan kokatua, egun Marokoren iparraldeko eskualdea da Rif, amazigen lurraldea. Aurrez amazigen altxamenduak egon ziren baina Rifeko gerra 1911tik 1927ra bitartean luzatu zen. Espainiar armadarentzat izugarrizko odolustea suposatu zuen gatazka honek.

Eustaquio Berriotxoa Elgarresta Urretxun 1899 jaiotako ingeniaria zen, dirudienez 1923.ean espainiar armadarentzat lurraldea kartografiatzera Rifera bidalitakoa. Duela bost urte berak ibilbide horretan egindako argazkiak agertu dira eta horien hautaketa bat eskaintzen dugu orain, Urretxuko udalari eskerrak, Zumalakarregi Museoan.

Berriotxoak bere lankideak jasotzen ditu argazki batzuetan, lanean eta aisialdian. Besteetan berriz amazigen gertuko ikuspegia eskaintzen digu, garaian etsaiak zirenen ohiko irudi manipulatuaz urrun.

Annualgo porrotaren ostean egindako argazkiak izan arren, alegia, espainiar armadak 10.000tik gora hildako jasan eta Abd-el-Krim amazigen buruzagiak Rifeko Errepublika aldarrikatu ondoren, Berriotxoaren argazkiek amazigekiko gertutasuna adierazten dute.

Bizargina Taount. Bizargina. Eustaquio Berriotxoaren argazkia. Urretxuko udala.

Erakusketa honetan gainera Zumalakarregi Museoan aurrez landu genuen Afrikako gerrari buruzko erreferentziak ere aurkituko dituzue. Izan ere 1859-1860 urteetan, euskaldunak marokoarren aurka borrokatu zuten Foru Aldundiek sortutako Euskal Tertzioetan. Mende erdi beranduago berriro bidali zituzten gazteak lurralde haiek menperatzera.

Azkenik, erakusketa osatzeko garaiko beste argazkilarien lanak ere aurkezten ditugu, Berriotxoaren ibilbideari gerra kolonialaren testuingurua eskaintzeko asmoz.

Eskerrik beroenak eman nahi dizkiegu Urretxuko Udalari eta Ahmed Zaidani, Marokoko historian adituari, proiektu honetan egindako lankidetzagatik.

Anima zaitezte aldi baterako erakusketa berri hau ikustera Zumalakarregi Museora inguratzera.

ORDUTEGIA

Martxoaren 1etik urriaren 31a bitarte:
Asteartetik larunbatera eta jai egunak: 10.00-14.00 / 16.00-19.00
Igandeak: 10.00-14.00

Azaroaren 1etik otsailaren 28a bitarte:
Asteartetik-Ostiralera eta igandeak: 10:00-14:00
Larunbat eta jai egunak: 10:00-14:00 / 16:00-19:00

PUBLIKOAK

A TARIFA: OROKORRA 3,00 €
B TARIFA: TALDEAK 2,00 € (5 lagun edo gehiago. Hezkuntza taldeak ez ezik.)
C TARIFA: MURRIZTUA 1,5 €
Tarifaren, orokorraren, gaineko %50ko murriztapena: Hirukide bazkideak (Kide ugariko familien elkarteetako Euskadiko federazioa) / Ikasleak / Gazte txartela / 65 urtetik gorakoak / Nekatur-eko bezeroak (Nekazalturismoa elkartea. Euskadiko nekazal eta landa etxeak) / Eusko Ikaskuntzako bazkideak (erakunde zientifiko kulturala)

Ekitaldiaren Babesleen Loturak

Zumalakarregi Museoa